बेनी। शुक्रबार साँझदेखि पर्वतको जलजला गाउँपालिका–२,बगरफाँँटबाट हराउनुभएका एक बालक सोमबारसम्म पनि भेटिनुभएको छैन। म्याग्दीको रघुंगा गाउँपालिका–६,कोटगाउँ घर भई हाल बगरफाँँट बस्ने ७ बर्षिय रुकेन पुन शुक्रबार साथीहरुसँग खेल्न गएको बेलामा सम्पर्कविहिन हुनुभएको थियो ।
बालक पुनको पर्वत र म्याग्दी प्रहरीको सक्रियतामा खोजीकार्य भइरहेको छ भने खेल्न गएका साथीहरुको भनाइको आधारमा कालिगण्डकी नदी आसपासमा समेत खोजीकार्यका लागि स्थानीय, आफन्त र सशस्त्र प्रहरी गलेश्वरको टोलीले शनिबारदेखि नै खोजीकार्य गरेपनि फेला पार्न सकेको छैन ।
बालक पुन सम्पर्कविहिन भएको खवर पाएपछि पर्वत र म्याग्दी प्रहरीले संयुक्त रुपमा पोखरा, मुस्ताङ लगायत नियमित सवारीसाधन आवतजावत गर्ने नाकाहरुमा खोजी समेत गरेको थियो । बालक हराएपछि सबै तिर खोजीकार्य भइरहेको छ । पर्वतको बौर क्षेत्रका बस्तीमा खेल्दा बालबालिकाको बल कालिगण्डकी नदीमै पुग्ने भएकाले पनि बालबालिकका लागि जोखिम मानिन्छ । बालकको हुलियासँग मिल्ने कतै देख्नुभएमा नजिकैको प्रहरीचौकी वा बालकको आमा दिलकुमारी पुनको नम्बर 9840144345 मा सम्पर्क गर्न सकिन्छ ।
