म्याग्दी ,सोमबार चैत १७ गते । विश्वव्यापी महामारीको रुपमा फैलिरहेको कोरोना भाइरसको संक्रमणलाई रोक्न सरकारले जारी गरेको लकडाउनको अवज्ञा गर्दै मादक पदार्थ ओसार पसार गर्ने व्यक्तिहरुलाई जिल्ला प्रहरी कार्यालय म्याग्दीले नियन्त्रणमा लिएको छ । बेनीबाट राखुतर्फ अत्याबश्यक सामाग्री ओसारपसार गर्ने नाममा मादक पदार्थ ढुवानी गरेको भेटिएपछि प्रहरीले मादक पदार्थ सहित चालक र सहचालकलाई नियन्त्रणमा लिएको हो ।
ग २ च ८८६९ नं.को जिपलाई ६ कार्टुन मादक पदार्थ सहित चालक जिल्ला म्याग्दी बेनी नगरपालिका –८ बस्ने बर्ष १९ को सुनिल कुमार शाह र सहचालक जिल्ला पर्वत जलजला गाउँपालिका–३ बस्ने बर्ष १८ को असल परियारलाई म्याग्दी प्रहरीले नियन्त्रणमा लिएको हो । नेपाल सरकार मन्त्री परिषद्को निर्णय बमोजिम मिति २०७६ चैत्र ११ गते देखी बिश्वभर महामारी रुपमा फैलिएको कोरोनाको संक्रमण रोक्न अत्यावश्यक वस्तु र सेवा मात्र संचालनको आदेश जारी गरिएको अवस्थामा,त्यस्ता वस्तु तथा सेवाहरूको कालोबजारी मदिरा जन्य पदार्थको ओसार पसार नियन्त्रण अत्यावश्यक बाहेक हिडडुलमा प्रतिवन्ध लगाएतका कार्यमा जिल्ला प्रहरी कार्यालय म्याग्दीले सक्रियता बढाएको छ ।
नियन्त्रणमा रहेका दुवै जनालाई आवश्यक कारबाहीको लागी जिल्ला प्रशासन कार्यालय म्याग्दीमा पठाईने प्रहरीले जनाएको छ । यस्ता क्रियाकलापहरू निषेधाज्ञा बिरूद्धका कार्यहरू भएकोले निजहरुलाई संक्रामक रोग ऐन २०२० को दफा २ को उपदफा १ बमोजिम नेपाल सरकारले गरेको आदेशको अपहेलना कसूरमा सोही ऐनको दफा ३ को उपदफा १ बमोजिम कानूनी कारबाही हुने ब्यबस्था छ ।
