बेनी ।सिटिजन लाइफ इन्स्योरेन्स कम्पनीको बेनीमा रहेको म्याग्दी शाखाले शनिबार दुई जना विमितका परिवारलाई रु १३ लाख ३९ हजार मृत्युदावी रकम भुक्तानी गरेको छ । विरामी भइ उपचारको क्रममा ज्यान गुमाएकी रघुगंगा गाउँपालिका–३ की बीमित धनकुमारी केसीको परिवारलाई रु ६ लाख ७१ हजार र दुर्घटनामा परि मृत्यु भएका सोही ठाउँकै भुवन बहादुर खत्रीको परिवारलाई रु ६ लाख ६८ हजार रकम हस्तान्तरण गरिएको हो ।
केसीका हकवाला श्रीमान गोविन्द केसी र खत्रीको आमा रमा खत्रीलाई कम्पनीका प्रमुख कार्यकारी अधिकृत पोषकराज पौडेल, शाखा प्रवन्धक सुवेदी लगायतले मृत्युदाबि रकमको चेक हस्तान्तरण गरेका थिए । ६ लाख रुपैयाँको बीमा पोलिसी खरिद गरकी केसीको एक किस्ता बुझाएपछि ब्रेन ट्युमर भई गत साउन २१ गते मृत्यु भएको थियो । कम्पनीले बीमाङ्क रकम रु ६ लाख, काजक्रिया खर्च रु ५० हजार र एक बर्षको बोनस बापतको रकम रु २१ हजार भुक्तानी गरेको शाखाले जनाएको छ ।
त्यसैगरि ३ लाख रुपैयाँको बिमा पोलिसी खरिद गरेका खत्रीको दुई किस्ता बुझाएपछि सडक दुर्घटनामा परि गत असोज १८ गते मृत्यु भएको थियो । कम्पनीले खत्रीका परिवारलाई बीमाङ्क रकम ३ लाख, दुर्घटना मृत्यु लाभ रकम ३ लाख, काजक्रिया खत्र्र ५० हजार र दुई बर्षको बोनस बापतको रकम १८ हजार भुक्तानी गरेको शाखा प्रवन्धक सुवेदीले जानकारी दिइन ।
