काठमाडौं । राष्ट्रिय समाचार समिति (रासस) का रिक्त सञ्चालक समिति सदस्यमा पत्रकार भगवान भण्डारी नियुक्त भएका छन् ।
सूचना तथा सञ्चार प्रविधिमन्त्रीस्तरको यही फागुन १० गतेको निर्णयानुसार रासस ऐन, २०१९ को दफा ८ को उपदफा १ को खण्ड (ख) बमोजिम पाल्पा, बगनासकाली गाउँपालिका–५, दर्लमडाँडा निवासी भण्डारी चार वर्षका लागि सदस्यमा मनोनयन भएका हुन् । भण्डारीले आइतबार मन्त्रालयमा पत्र बुझेका छन् ।
विसं २०५१ देखि पत्रकारितामा आबद्ध तथा हाल ‘पाल्पा समाचारपत्र’ साप्ताहिक र ‘पाल्पा समाचार डटकम’का प्रधानसम्पादक भण्डारी नेपाल पत्रकार महासंघ, पाल्पाका निवर्तमान अध्यक्ष र प्रेस सङ्गठन नेपालका केन्द्रीय सदस्य हुन् ।
मानवअधिकार एलायन्सका जिल्ला अध्यक्ष तथा जिल्लास्तरीय मानव अधिकार सञ्जालका संयोजक भण्डारी विगतमा रेडियो नेपालका संवाददाता र रेडियो मदनपोखराका संस्थापक समाचार प्रमुख भइसकेका छन् ।
पत्रकारिता क्षेत्रमा साढे दुई दशकदेखि संलग्न भण्डारी ‘जनसेवा श्री’ (पाँचौँ) पदकबाट सम्मानित हुनाका साथै नेपाल प्रेस इन्स्टिच्युटलगायत विभिन्न संस्थाबाट तालीमप्राप्त छन् । रासस
