कास्की । गण्डकी प्रदेशमा कोरोना भाइरसको संक्रमणबाट थप ६ जनाको मृत्यु भएको छ । प्रदेशमा पछिल्लो २४ घण्टामा विभिन्न अस्पतालमा उपचाररत ६ जनाको मृत्यु भएको हो । गण्डकी प्रदेशमा तीन जिल्लामा ६ जना कोरोना संक्रमितको उपचारका क्रममा मृत्यु भएको प्रदेश स्वास्थ्य निर्देशक डा।विनोदबिन्दु शर्माले जनाकारी दिनुभयो ।
उहाँका अनुसार कास्कीमा ४, गोरखा १ र नवलपरासी पूर्व १ जनाको कोरोना संक्रमणका कारण मृत्यु भएको छ । योसँगै गण्डकी प्रदेशमा कोरोना संक्रमणका कारण मृत्यु हुनेको संख्या ८२३ पुगेको छ । त्यसैगरी गण्डकी प्रदेशमा सोमबार थप ३७६ जनामा कोरोना भाइरसको संक्रमण पुष्टि भएको छ । पछिल्लो २४ घण्टामा १ हजार ४०२ जनाको नमुना परिक्षण गरिएकामा ३७६ जनामा संक्रमण देखिएको हो ।
संक्रमितमध्ये १७६ महिला र २०० जना पुरुष रहेको प्रदेश स्वाथ्य निर्देशनालय गण्डकीले जनाएको छ । निर्देशनालयका अनुसार नयाँ संक्रमितहरुमा कास्कीमा १११, गोरखामा २७, नवलपरासी ७७, स्याङजा ५,बागलुङ ११, तनहुँ ३७, लमजुङ ३२, पर्वत ४४ मुस्ताङ १ र म्याग्दीमा ३१ जनामा कोरोना संक्रमण देखिएको छ ।
योसँगै गण्डकी प्रदेशमा कोरोना संक्रमितको संख्या ४९ हजार ४१४ पुगेको छ । प्रदेशमा पछिल्लो २४ घण्टामा ३४७ जना कोरोना संक्रमणमुक्त भएका छन् । योसँगै गण्डकीमा हालसम्म संक्रमणमुक्त हुनेहरुको संख्या ४२ हजार ३०८ पुगेको छ । रातोपाटीबाट
