म्याग्दी । म्याग्दीमा यहि जेठ १५ गते विविध कार्यक्रमको आयोजना गरि १८ औँ गणतन्त्र दिवस मनाइने भएको छ ।
आईतवार जिल्ला समन्वय समिति म्याग्दीका कार्यवाहक प्रमुख तथा गणतन्त्र दिवस–२०८२ मूल समारोह समितिका संयोजक डिल कुमारी खत्रीको अध्यक्षतामा वसेको वैठकले जेठ १४, १५ र १६ गते छुट्टाछुट्टै कार्यक्रम गरि दिवस मनाउने निर्णय गरेको हो ।
वैठकले जेठ १४, १५ र १६ गते जिल्ला स्थित सम्पूर्ण सरकारी कार्यालय तथा संघ संस्थाहरुले कार्यालय परिसरमा राष्ट्रिय झण्डा सजाउने र साँझ घरघरमा दीप प्रज्ज्वलन गर्ने, १४ गते विहान ८ बजे नेपाल रेडक्रस सोसाईटी, प्रदेश जनस्वास्थ्य कार्यालय म्याग्दी र म्याग्दी जेसीजको व्यवस्थापनमा बेनी अस्पतालमा रक्तदान कार्यक्रम संचालन गर्ने निर्णय गरेको छ ।
त्यस्तै जेठ गते विहान साढे सात बजेदेखि जिल्ला स्थित राजनैतिक दल, जनप्रतिनिधि, राष्ट्रसेवक, सुरक्षानिकाय, कर्मचारी, संघसंस्थाका प्रतिनिधिहरुको वृहत उपस्थितिमा प्रभातफेरी कार्यक्रम संचालन गरिने मुल समारोह समितिका संयोजक तथा जिल्ला समन्वय समितिकी कार्यवाहक प्रमुख खत्रीले बताउनुभयो । १५ गते दिउँसो राष्ट्रिय लोक तथा दोहोरी गीत प्रतिष्ठान म्याग्दीको आयोजनामा अन्तरमावि लोक गीत प्रतियोगिता संचालन हुनेछ ।
१५ गतेको साँझ गैरसरकारी संस्था महासंघको व्यवस्थापनमा विरेन्द्रचोकमा गणतन्त्रको प्रतिक राष्ट्रिय झण्डाको आकार बनाई दीप प्रज्ज्वल गर्ने कार्यक्रम तय गरिएको छ ।
यसैगरि १६ गते विहान जनप्रतिनिधि, राजनैतिक दल, कर्मचारी, संघसंस्थाको प्रतिनिधिहरुको उपस्थिति सहित डिभिजन वन कार्यालयको व्यवस्थापनमा बेनी नगरक्षेत्र भित्र वृक्षारोपण गरिने भएको छ ।गणतन्त्र दिवसको प्रचारप्रसारको जिम्मेवारी पनि नेपाल पत्रकार महासंघको समन्वयमा जिल्ला स्थित सम्पूर्ण संचारमाध्यमहरुलाई दिईएको छ । जनआन्दोलन २०६२÷६३ को जगमा भएको निर्वाचनबाट गठित संविधानसभाको पहिलो बैठकले २०६५ जेठ १५ गते नेपाललाई संघीय लोकतान्त्रिक गणतन्त्र घोषणा गरेको थियो ।
२३८ वर्ष लामो शाह वंश राजपरम्पराको अन्त्यको घोषणा भएको उक्त दिनलाई प्रत्येक वर्ष गणतन्त्र दिवसका रूपमा मनाउँदै आएको छ ।
