काठमाडौं । नेपाली राष्ट्रिय फुटबल टोलीका मिडफिल्डर विशाल राई पनि सुरक्षित भविष्यको खोजीमा अष्ट्रेलिया जानुभएको छ । विदेशिनुभएका राई राष्ट्रिय टोलीका नियमित सदस्य हुनुहुन्छ । विशाललाई शुक्रबार बिहान मच्छिन्द्र क्लबका सहयात्रीले त्रिभुवन अन्तर्राष्ट्रिय विमानस्थलमा बिदाइ गरेका छन्।
‘फुटबलबाट राष्ट्र अनि नेपाली क्लबलाई तिमीले दिएको योगदान सदैव अविस्मरणीय रहिरहनेछ । विशाल भाइलाई उज्ज्वल भविष्यको कामना । तिम्रो अष्ट्रेलिया बसाइ सुखद एवं फलदायक रहोस्,’मच्छिन्द्र क्लबका व्यवस्थापक अनिल श्रेष्ठले लेख्नुभएको छ ।
सहिद स्मारक ‘ए’ डिभिजन लिग च्याम्पियन मछिन्द्र फुटबल क्लबका मिडफिल्डर समेत हुनुहुन्छ । नयाँ सिजनको लिग नजिकिदै गर्दा भने उहाँ अष्ट्रेलिया लाग्नुभएको छ । नयाँ सिजनको‘ए’ डिभिजन लिग फागुन १९ गतेबाट सुरु हुँदैछ ।
मछिन्द्रले लगातार दुई पटक लिग जित्दा उहाँ टिमका मुख्य खेलाडी हुनुहुन्थ्यो । विशालले मनाङ मर्स्याङ्दी क्लबबाट समेत लिगको उपाधि जित्नुभएको थियो।विशालले नेपालको उमेर समूह हुँदै राष्ट्रिय टोलीबाट खेल्नुभएको हो। विशालले नेपालका लागि २८ खेलमा ३ गोल गर्नुभएको छ ।
पछिल्लो समय खेलाडी पलायन तिब्र भइरहेको छ। पछिल्लो दुई वर्षमा मात्र करिब दुई दर्जन राष्ट्रिय टोली र उमेर समूहमा मुलुकको प्रतिनिधित्व गरिसकेका खेलाडी अस्ट्रेलिया पुगेका छन्। अखिल नेपाल फुटबल संघ (एन्फा)ले फागुन १९ देखि ए डिभिजन फुटबल लिग आयोजना गर्ने तालिका सार्वजनिक गर्दैगर्दा राष्ट्रिय खेलाडीको डरलाग्दो पलायन देखिएको छ।अधिकांश राष्ट्रिय फुटबलहरू राष्ट्रको नेतृत्व गर्न छोडेर अस्ट्रेलियामा हुने टोलकपमा सपना बुन्दै पलायन हुन थालेका छन्।
