दरवाङ । पश्चिम नेपाल बचत तथा ऋण सहकारी संस्थाको आयोजनामा म्याग्दीको मालिका गाउँपालिका–६ दरवाङमा निशूल्क स्वास्थ्य शिविर सम्पन्न भएको छ । ग्रामिण क्षेत्रका सर्वसाधारणलाई लक्षित गरेर शिविर आयोजना गरेको सहकारीले जनाएको छ ।
सहकारीको केन्द्रिय कार्यालयका आर्थिक प्रशासन प्रमुख तथा सूचना अधिकारी मेघराज शर्माले फिस्टेल अस्पताल पोखराको प्राविधिक सहयोगमा भएको शिविरमा ४३४ जनाले सेवा लिएका जानकारी दिनुभयो । “सहकारीको सामाजिक उत्तरदायित्व अन्र्तगत गाउँमै विशेषज्ञ स्वास्थ्य उपचार सेवा उपलब्ध गराउने उद्देश्यले शिविर आयोजना गरिएको हो,” उहाँले भन्नुभयो “बेनी नगरपालिका, मंगला, मालिका, धवलागिरी गाउँपालिकाका सर्वसाधारणले सेवा लिनुभएको छ ।”
शिविरमा स्वास्थ्य परिक्षण, निशूल्क औषधी वितरण, परामर्श, भिडियो एक्सरे, पाठेघरको मुखको क्यानसर र स्तन क्यान्सरको प्रारम्भिक परिक्षण सम्बन्धी सेवा दिइएको सहकारीका सञ्चालक समितिका सचिव कृष्ण आचार्यले बताउनुभयो ।
फिस्टेल अस्पताल पोखराका चिकित्सकहरु गोमा तुलाचन, बर्षा बराल, जनरल फिजिसियन हेमन्त बास्तोला, सनम ढकाल, रेडियोग्राफर डा. अनमोल तुलाचनका साथै दरवाङ आधारभूत अस्पतालका प्रमुख गायत्री पौडेल, लक्ष्मी मल्ल पुर्जा, दिपा परियार, धनमाया पुन, पार्वति पन्त, भवि सापकोटा, गाउँपालिकाका स्वास्थ्य शाखा प्रमुख सन्तुकुमारी कार्की लगायतका स्वास्थ्यकर्मीहरुको टोलीले सेवा दिनुभएको थियो ।
सहकारीका अध्यक्ष भिमप्रसाद गौतमको अध्यक्षता र सचिव कृष्णप्रसाद आचार्यको सञ्चालनमा सम्पन्न शिविरको उद्घाटन मालिका गाउँपालिकाका अध्यक्ष बेगप्रसाद गर्बुजाले उद्घाटन गर्नुभएको थियो । अध्यक्ष गर्बुजाले सहकारीले स्वास्थ्य र सार्वजनिक क्षेत्रमा निभाएको भूमिकाप्रति धन्यवाद दिनुभयो ।
सञ्चालक समितिका कोषाध्यक्ष श्रीराम पौडेलको स्वागत मन्तब्यमा सम्पन्न कार्यक्रममा गाउँपालिकाका उपाध्यक्ष लक्ष्मीदेवी घर्ति, सहकारीको सञ्चालक समितिका पदाधीकारी, सदस्य र कर्मचारीहरुको उपस्थिति थियो ।
मालिका गाउँपालिकाको केन्द्र दरवाङमा प्रधान कार्यालय रहेको पश्चिम नेपाल बचत तथा ऋण सहकारी संस्थाको ताकम, बाबियाचौर, दरवाङ, तातोपानी, वारीबेनी, भगवती र पोखरेबगरमा सेवा केन्द्र रहेका छन् ।
आर्थिक वर्ष २०७९÷०८० सम्ममा छ हजार १२२ जनाको रु. १२ करोड ९५ लाख १८ हजार २०० सेयर पुँजी रहेको सहकारीले गत आर्थिक वर्षमा रु. ६६ करोड ३७ लाख ९७ हजार १७ निक्षेप संकलन, रु. ७४ करोड चार लाख ७६ हजार ६८६ लगानी गरेको संस्थाले रु. एक करोड ५९ लाख ५६ हजार ८२३ आम्दानी गरेको थियो ।
वि.स. २०६४ मा दरवाङ बजारमा २७ जनाले रु. एक÷एक सय सेयरबाट सहकारी शुरु गरेका थिए । समान उद्देश्य भएका सहकारी संस्थालाई गाभ्ने नीति लिएको पश्चिम नेपालले गण्डकी प्रदेशको नमुना सहकारी बनाउने लक्ष्य सहित न्युन आय भएका सदस्यहरुको जिवनस्तर उकास्न दूध तथा मासुजन्य कर्जाको कार्यक्रम सञ्चालन गरेको प्रबन्धक प्रेमलाल कडेल (सदन)ले बताउनुभयो ।
