बाढीले डडेल्धुरामा निर्माणाधीन मोटरेबल पुल बगायो

धनगढी । लगातार परिरहेको अविरल वर्षासँगै आएको बाढीले डडेल्धुरामा निर्माणाधीन मोटरेबल पुल बगाएको छ । जिल्लाको गन्यापधुरा गाउँपालिका– ३ र नवदुर्गा गाउँपालिका–३ लाई जोड्ने लमखेती गाडको सकाइल खण्डमा सडक विभागले निर्माण गरिरहेको पुल बुधबारदेखि परिरहेको वर्षासँगै आएको बाढीले बगाएको हो ।

गन्यापधुरा गाउँपालिकाका अध्यक्ष नवलबहादुर मल्लले सकाइल हुँदै नवदुर्गा गाउँपालिकाको डाँणा वन जोड्ने सडकखण्डको लमखेती गाडमा निर्माण भइरहेको पुल बगाएको बताउनुभयो ।

अभ्यक्ष मल्लले भन्नुभयो , पानीथुन्नबाँधिएको ड्यामको एक दुई ठाउँबाट निकास दिन खोज्दा माटोको ढिस्को फुटेर ढलान गर्न ठिक्क पारिएको पुलबगाएको हो।’ ‘पिल्लर नबगाएपनि सटरिङ गरिएका सबै बगाएको छ । ठूलो क्षति नै त भएको छैन ।’ पाँच करोड ५२ लाखमा ठेक्का पाएको राजेन्द्र चाँदनी जेभीले पुल निर्माणको काम गरिरहेको थियो ।

जेभीका सञ्चालक आकाश गुरुङले एक्कासी आएको बाढीले ड्याम थुनिए पनि पुल बगाएको बताउनुभयो । उहाँका अनुसार करिब ६ वर्षअघि ठेक्का सम्झौता भएको उक्त पुलको सम्झौता अवधि आउँदो असारमा सकिँदैछ थियो भने शुक्रबार पुलको ढलान गर्ने तयारी गरिएको थियो ।

तर त्यस अगावै आएको बाढीले पुल भत्काएपछि अब सबै काम प्रभावित भएको गुरुङले बताउनुभयो । उहाँले अहिले पनि वर्षा जारी रहेकाले काम गर्न सक्ने अवस्था नरहेकाले भदौपछि मात्र बाँकी निर्माण कार्यअगाडि बढाउने जानकारी दिनुभयो । अनलाइनखबरबाट

तपाईको प्रतिक्रिया

सम्बन्धित समाचार