दरवाङ । नेपाल रेडक्रस सोसाइटीको ६४औँ स्थापना दिवसको अवसरमा म्याग्दीका दुई स्थानमा आयोजित रक्तदान कार्यक्रममा ११८ जनाले रक्तदान गरेका छन् । नेपाल रेडक्रस सोसाइटी म्याग्दी जिल्ला शाखाको आयोजना तथा स्थानीय शाखा र उपशाखाको सहआयोजनामा बिहीबार मालिका गाउँपालिका–६ दरवाङ र मंगला गाउँपालिका–२ बाबियाचौरमा रक्तदान कार्यक्रम गरिएको हो । कार्यक्रमको उद्घाटन मालिका गाउँपालिकाका अध्यक्ष बेगप्रसाद गर्बुजाले गर्नुभएको थियो ।
कार्यक्रममा दरवाङमा ६६ र बाबियाचौरमा ५२ जनाले रक्तदान गरेको रेडक्रस म्याग्दीका उपमन्त्री मोतीराज गौतमले जानकारी दिनुभयो । रसुवामा हालै आएको प्राकृतिक विपद्मा परी घाइते भएकाहरूको उपचारका लागि आवश्यक रगत व्यवस्थापनमा सहयोग पुर्याउने उद्देश्यले रक्तदान कार्यक्रम आयोजना गरिएको रेडक्रसले जनाएको छ ।
दरवाङ बजारस्थित आधारभूत अस्पतालमा आयोजित कार्यक्रममा मालिका गाउँपालिका शाखा र दरवाङ उपशाखाले सहआयोजनाको भूमिका निर्वाह गरेका थिए । यस्तै, मंगला गाउँपालिका शाखा र बाबियाचौर उपशाखाको सहआयोजनामा बाबियाचौरमा रक्तदान कार्यक्रम सञ्चालन गरिएको थियो ।
रक्त संकलनका लागि नेपाल रेडक्रस सोसाइटी कास्की जिल्ला शाखाअन्तर्गतको प्रादेशिक रक्तसञ्चार सेवा केन्द्रले प्राविधिक सहयोग उपलब्ध गराएको थियो । कार्यक्रममा रेडक्रसका पदाधिकारी, स्वास्थ्यकर्मी, प्राविधिक टोली, विद्यार्थी र स्थानीय स्वयंसेवक सहभागी भएका थिए ।
दरवाङमा जनप्रिय माध्यमिक विद्यालय र केबी बोर्डिङ स्कुलका विद्यार्थीले कार्यक्रम व्यवस्थापन तथा स्वयंसेवी कार्यमा सहयोग गरेका थिए । कार्यक्रममा रेडक्रस म्याग्दीका सभापति अमर बानियाँसहित पदाधिकारी तथा स्थानीय जनप्रतिनिधिको उपस्थिति रहेको थियो ।
मानवीय सेवा तथा विपद् व्यवस्थापनमा सक्रिय रेडक्रस म्याग्दीले बेनीस्थित प्रदेश अस्पताल परिसरमा रक्तसञ्चार केन्द्र सञ्चालन गर्दै आएको छ । संकलित रगत विपद्का घाइते तथा आकस्मिक उपचार आवश्यक पर्ने बिरामीको उपचारमा प्रयोग गरिने रेडक्रसले जनाएको छ ।
