बेनी । नेकपा एमाले म्याग्दीले जिल्लाका सबै स्थानीय तहमा अधिवेशन सम्पन्न गर्दै नयाँ नेतृत्व समेत चयन गरेको छ । पाँच गाउँपालिका र एक नगरपालिका रहेको म्याग्दीमा अधिवेशनबाट सर्वसम्मत चुनिएका पालिका कमिटीमा युवा नेताको बर्चस्व रहेको छ । एमालेले सबै पालिकामा दोस्रो अधिवेशनबाट नयाँ कमिटी चयन गरेको हो ।
बेनी नगरपालिका कमिटी अध्यक्षमा बेलबहादुर कटुवाल, मालिका गाउँपालिकामा दलमान पुन, धवलागिरीमा प्रगति कार्की, अन्नपूर्णमा धनकुमार पुर्जा, रघुगंगामा झलक आचार्य र मंगला गाउँपालिका कमिटी अध्यक्षमा यामबहादुर थापा मगर सर्वसम्मत चयन हुनुभएको छ ।
आगामी निर्वाचनमा जिल्लाका सबै पालिकामा एमालेका उम्मेदवारलाई जिताउन अहिल्यैदेखी योजनाबद्द तरिकाले लाग्ने बेनी नगर कमिटी अध्यक्ष कटुवालले बताउनुभयो । म्याग्दीका सबै पालिकामा अधिवेशन सम्पन्न भएको र चैत महिना भित्र सबै वडामा अधिवेशन सक्ने योजना रहेको एमाले म्याग्दीका अध्यक्ष बालकृष्ण सुवेदीले बताउनुभयो ।
